个屠明珠，啥气得来？耐看我阿要去做屠明珠？”素芬道：“耐是倒也说勿定。”蔼人道：“我再去做别人，故末说勿定；要说是屠明珠，就算俚搭我要好末，我也匆高兴去做俚。”素芬道：“耐去做勿做关倪啥事体！耐也要勿来搭我说。”蔼人乃一笑而罢。

    素芬装好一口烟，放下烟枪，起身走开。蔼人自去吸了，知道素芬还有些芥蒂，遂又自去开了抽屉，寻着笔砚票头随意点几色菜水。素芬看见，装做不理；等蔼人写毕，方道：“耐点菜末，阿要先点两样来吃夜饭？”蔼人忙应说：“好。”另开两个小碗，素芬叫娘姨拿下楼去令外场叫菜。

    正是上灯时候，菜已送来，自己又添上四只荤碟，于是蔼人与素芬对酌闲谈。一时复说起屠明珠来，素芬道：“做倌人也只做得个时髦。来哚时髦个辰光，自有多花客人去烘起来。

    客人末真真叫讨气，一样一千洋钱，用拨来生意清点个倌人，阿要好？用拨仔时髦倌人，俚哚觉也勿觉着。价末客人哚定归要去做时髦倌人，情愿豁脱仔洋钱去拍俚马屁。”蔼人道：“耐要勿说客人讨气，倌人也讨气。生意清仔末，随便啥客人巴结得非凡哚；稍微生意好仔点，难末姘戏子、做思客才上个哉，到后来弄得一场无结果。”素芬道：“姘戏子多花到底少个，故也要勿去说俚哉。我看几个时髦倌人，也无啥好结果。耐来里时髦辰光，拣个靠得住点客人，嫁仔末好哉唍，俚哚才匆想嫁人；等到年纪大仔点，生意一清仔末，也好哉。”蔼人道：“倌人嫁人也难。要嫁人，陆里一个勿想嫁个好客人？碰着仔好客人，俚屋里大小老婆倒有好几个来浪，就嫁得去，总也匆称心个哉。要是无拨啥大小老婆末，客人靠勿住，拿耐衣裳、头面才当光仔，再出来做倌人。夷场浪常有该号事体。”素芬道：“我说要搭客人脾气对末好。脾气对仔，就穷点，只要有口饭吃吃好哉。要是差仿勿多客人，故末宁可拣个有铜钱点总好点。”蔼人笑道：“耐要拣个有铜钱点，像倪是挨勿着个哉。”

    素芬也笑道：“噢唷！客气得来！耐算无铜钱，耐来里骗啥人嗄？”蔼人笑道：“我就有仔铜钱，脾气勿对，耐也看勿中唍。”素芬道：“耐说说末就说勿连牵哉。”随取酒壶给蔼人筛酒。蔼人道：“酒有哉，倪吃饭罢。”素芬遂喊娘姨拿饭来，并令叫妹子翠芬来同吃。娘姨回说：“翠芬吃过哉。”

    蔼人、素芬两人刚吃华饭，即有一帮打茶会客人上楼，坐在对过空房间里，随后复有叫素芬的局票。蔼人趁势要走。素芬知留不住，送至房门。蔼人下楼登轿，径回公馆。次日晚间，免不得请一班好友在林素芬家摆个双台，不必细说。

    至三月初三，十点钟时，朱蔼人起来，即乘轿往大观园。

    只见门前挂灯结彩，张寿带着纬帽迎见，禀说：“陈老爷、洪老爷、汤老爷才来里哉。”蔼人进去厮见，动问诸事，皆已齐备。蔼人大喜，乃说道：“价末我到该首去哉，此地奉托三位。”

    陈小云、洪善卿、汤啸庵都说：“应得效劳。”当时蔼人复乘轿往鼎车里屠明珠家。

    第十八回终。

『加入书签，方便阅读』